Rut 3 | NdeIBE | STEP | Ngelinye ilanga uNawomi, uninazala wathi kuye, “Ndodakazi yami, akungcono ngikudingele umuzi lapho ozagcineka khona kuhle na?

Ruth 3

URuthe loBhowazi eSizeni

1 Ngelinye ilanga uNawomi, uninazala wathi kuye, “Ndodakazi yami, akungcono ngikudingele umuzi lapho ozagcineka khona kuhle na? 2 Angithi uBhowazi, lo obusebenza lamantombazana akhe, yisihlobo sethu. Ngobusuku balamhlanje uzabe esela ibhali esizeni. 3 Geza, uziqhole ngamakha, ugqoke ezokuceca. Ube ususiya esizeni, kodwa ungaze waziveza kuye aze aqede ukudla. 4 Nxa eselala, uqaphelise indawo alala kuyo, ube usufika wambule ezinyaweni zakhe ulale lapho. Uzakutshela ukuthi wenzeni.”

5 URuthe wathi, “Ngizakwenza lokho ongitshela khona.” 6 Wasesuka waya esizeni wenza konke ayekutshelwe nguninazala.

7 Kwathi uBhowazi esethabe kakhulu ngemva kokudla lokunatha, wasuka wayalala ekucineni kwenqumbi yamabele. URuthe wasondela ngokuthula, wembula izinyawo zakhe waselala lapho.

8 Kwathi phakathi kobusuku indoda yethuswa ngokuthile, yasiphenduka yathola owesifazana elele ezinyaweni zayo.

9 Yabuza yathi, “Ungubani wena?” Yena waphendula wathi, “NginguRuthe, incekukazi yakho. Ngembathisa ngesambatho sakho, njengoba uyisihlobo sethu esingumhlengi.”

10 Yena wathi, “UJehova akubusise, ndodakazi yami. Umusa wakho lo mkhulu ukwedlula lokho okwenze kuqala. Awuzange ukhethe ukulandelana lamajaha, ingabe nganothileyo loba angabayanga. 11 Ngakho-ke, ungesabi ndodakazi yami. Ngizakwenzela konke okucelayo. Bonke abantu bakulo umuzi bayakwazi ukuthi wena ungowesifazana oqotho. 12 Loba kuliqiniso ukuba mina ngiyisihlobo esiseduze, ukhona oyisihlobo esihlengayo esiseduze okwedlula mina. 13 Hlala lapha kulobubusuku, kuthi ekuseni nxa efuna ukukuhlenga; uzakwenza njalo. Kodwa nxa engakavumi lokho, mina ngizakwenza lokho njengoba uJehova ephila. Lala lapha kuze kuse.”

14 Ngakho walala kwaze kwasa, wasevuka engakananzelelwa muntu; uBhowazi wathi kuye, “Ungaze watshela muntu ukuthi ukhona owesifazana oke weza esizeni.”

15 Wathi njalo, “Letha kimi isambatho leso osembetheyo usivule.” Kwathi esenzenjalo wathatha kuso ibhali eliyizilinganiso eziyisithupha wamethesa. Wasesuka wabuyela ngekhaya.

16 URuthe wathi efika kuninazala, uNawomi wabuza wathi, “Kuhambe njani ndodakazi yami?” Yena wamtshela konke ayekwenzelwe nguBhowazi, 17 wengeza esithi, “Ungiphe izilinganiso eziyisithupha zebhali wathi, ‘Ungaze wabuyela kunyokozala ungelalutho.’ ”

18 UNawomi wasesithi, “Mana, ndodakazi, uze ubone okuzakwenzakala. Umuntu lo kasoke aphumule indaba le ize ilungiswe lamhlanje.”